八屍命案緝兇手 嚴防飆車撞牛牛

真係慘不忍睹,簡直慘無牛道,大嶼山有一家大細八隻牛牛滅門慘死呀,冇陰功!

大嶼山長沙泳灘附近前日驚現血淋淋嘅恐怖一幕,五隻黃牛當場死亡,另外三隻奄奄一息,雖然有獸醫到場企圖搶救,可惜最終都係返魂無術,嚴重受傷嘅流浪牛救無可救必須人道毀滅。

到底因乜事幹會發生八屍命案嘅呢?唔通六月四日北京出現「六月飛霜」嘅天文異象真係邪門得咁交關?警方懷疑牛群受到汽車撞擊,反轉大嶼山搜捕十小時,終於喺塘福村搵到懷疑涉案嘅四驅車,車底沾有牛毛,而且車頭有損毀痕迹。警方以涉嫌虐待動物罪名拘捕英籍女車主,由重案組接手調查。

之不過問題係,一架四驅車竟然能夠一次過撞死八隻牛?打保齡球都冇咁容易全中啦,何況成年黃牛體積唔細o架,一架四驅車嘅殺傷力未必有咁大,所以殺牛兇器唔排除係另有其車,冷血屠夫有機會仍未落網。

集體屠牛事件發生之後,大嶼山愛護水牛協會懸紅十萬元緝拿兇徒,呼籲各路英雄幫手查察所有大型車輛,務求沉冤得雪,為無辜慘死嘅牛牛討回一個公道。

惻隱之心,人皆有之,眼見八屍命案咁殘忍又咁可憐,好心官老爺就唔好懶懶閒啦,有必要想方設法保護動物生命安全。即係咁,大嶼山嘅嶼南路又冇禁區亭,又冇安裝偵速攝影機,又冇減速路壆,路上更加冇警察巡邏,好容易吸引飛車黨非法進入禁區橫衝直撞o架。流浪牛被撞死撞傷固然唔好啦,其實對於撞牛嘅車輛亦構成一定嘅危險,萬一撞牛之後失控,隨時車毀人亡吖嘛。所以運輸署同警務處有必要改善當地嘅道路安全,最低限度要安裝偵速攝影機,並且杜絕冇通行證嘅車輛進入禁區,阻嚇飆車一族到此一遊。

由愛護動物嘅角度出發,漁農自然護理署都責無旁貸囉,必須將流浪牛遷徙去遠離人煙嘅地方,一來牛牛安全啲,唔使被撞到飛起,二來避免民居受到有時候都幾惡搞嘅蠻牛滋擾。正常而言,人同牛係可以和平共處嘅,之不過人類往往係心腸歹毒嘅衣冠禽獸,虐貓虐狗時有所聞啦,你唔可以保證冇變態男女專門以虐牛為樂。所以咯喎,將流浪牛遷徙去遠離人煙嘅地方係應該嘅,至少唔好畀牛牛亂過馬路吖嘛。

點都好啦,家陣最緊要嘅係將殺牛真兇繩之以法,藉此向世人宣示一個訊息,動物都有生命o架,牛牛都有阿媽生o架,人渣必須尊重動物嘅生存權利,否則下世投胎話唔定豬狗不如!