香港教育政策朝令夕改，搞到學校、家長、教師、學生無所適從。想不到如今更加混亂，尤其應付內地雙非兒童湧港就讀，小一學額分配亂象叢生，一個乜鬼「返回機制」，因「返回」學額分配不均兼改來改去，未「返回」已胡混到「車軸捲亂麻——理不出個頭緒來」！
老朽雖已不再誤人子弟，可即使「旁觀他人之痛苦」，也深切同情北區校長、師生們的憤怒與無奈。有校長遞交信件，炮轟當局在處理北區學額不足上欠誠信，一時話咁一時又唔係，搞到校長開班失晒預算；至於家長對當局「返回機制」五時花六時變，擔心自己仔女唔知有冇學位而搞到幾乎崩潰。
老朽雖然愛嬉戲人生，笑看天下，之不過今次要好嚴肅話畀政府知，唔好搵啲外行領導內行，明明善投資睇股價走勢，偏偏叫佢搞教育，真係想掂都難！遙想孫公當年，雖多病纏身，畢竟都懂得「微調」，如今「唔得掂」搞到天怒人怨，老朽完全睇唔到政府有何「適度有為」？但見街上無兵，卻亂到人踩人，狗吠狗，螞蟻摟死大笨象，一片殘山剩水，教育遠景完全一副「我走之後，不管洪水滔天」嘅心態，咁下去，香港嘅教育怎會有明天？
老朽想起宋朝筆記《艾子雜說》內一個寓言。話說艾子漫步沙灘，忽見一圓扁多腳的動物在沙上橫行，問：此何物也？水邊人家答是梭子蟹。艾子繼續往前走，又見到比梭子蟹個頭小一圈的圓扁動物，再問：此何物也？答曰：此螃蟹。艾子又走了一段路，又見到一袖珍的動物，詫異道：又係乜水啊？答曰：此乃蟛蜞！艾子喟然長嘆：真是一蟹不如一蟹！
今特區政府上上下下何嘗不是一蟹不如一蟹？三十萬厚酬搵個「唔得掂」搞教育，唉，一個光禿禿嘅籠，難看，給它刷上一層金粉，你估就會脫胎換骨咩？