由學者主導嘅「佔領中環」來勢洶洶，即將來臨嘅周日更有首場商討日，建制派早前「搶閘」由香港島各界聯合會理事長蔡毅牽頭搞咗個「家是香港，守護中環」倡議書，擺明想同「佔中」分庭抗禮。不過，最終都係無法搶佔太多輿論關注，連親中陣營都有人對呢個行動有微言，唔知呢啲係咪叫做落筆打三更呢？
對於「守護中環」行動效果一般，有親中人士歸咎呢個行動可能搵錯代言人。該名親中人士分析，呢個守護中環行動，講到尾應該搵啲真嘅「中環友」，好似着開西裝打呔嘅年輕一輩擔大旗，依家由蔡毅牽頭，無疑佢係港島各界聯合會負責人，但弊在佢本身親中色彩太濃，加上有太多建制派地區團體參與，恐怕好難引起真正嘅「中環友」共鳴。
據聞有親中人士都見到「守護中環」行動未能令輿論有太多關注，有關方面計劃搵番啲較專業中立人士開腔反對「佔中」。另外聽聞亦有部分業界，好似最受「佔中」影響嘅旅遊界醞釀稍後一齊發聲反對「佔中」，希望喺出師有名下令守護中環獲得更多人認同。究竟呢一切反對「佔中」行動會否突圍而出，就要睇吓佢哋搞到幾有聲有色喇！