立法會尋日辯論由資訊科技界莫乃光（Charles）提出嘅「捍衞資訊、網絡及新聞自由」動議，政制及內地事務局局長譚志源去咗台灣交流，留低副局長劉江華披甲上陣。為咗確保不容有失，局方特別搵咗幾個政務官（AO）做狗仔隊企喺會議廳外數票兼箍票。不過，今次只係一個無約束力嘅動議，局方咁樣做似乎有啲小題大做喎。
Charles發言時批評政府近年收緊資訊發放，令傳媒壓力愈來愈大，加上政府早前曾推出「網絡廿三條」，令人擔心網絡自由會逐漸被削弱。劉江華回應時話，各政策局每年舉辦至少一千次記者會同簡報會，警方亦有制訂指引便利傳媒進行採訪工作，佢重申，《基本法》保障新聞自由，政府非常重視同珍惜新聞及資訊自由，亦會繼續致力為傳媒行業提供合適寬鬆空間。
立法會最後否決包括要求取消設立纏擾法、制訂資訊自由法、盡快發出免費電視牌照等五項修正案，但係原議案就獲得在席所有議員支持。當局中人解釋，派出狗仔隊並唔係政制及內地事務局嘅專利，又話個個局都有咁樣做，只係人哋較為低調喎。