政情：蔡新榮玩橋牌度日
香港國際機場作為全世界最繁忙機場之一，要留住旅客自然要有出色嘅餐廳，最近外號「少年食神」嘅林澄光喺機場開餐廳，機管局就派出機場運行執行總監吳自淇捧場，另外仲有過檔到機管局擔任建築工程執行總監嘅前土木工程拓展署署長蔡新榮。同蔡新榮講起，原來佢過去兩年嘅退休生活，全靠同朋友玩橋牌過日辰。
任擴建第三條跑道大旗手
曾喺政府任職三十多年嘅蔡新榮，之前曾擔任青馬大橋項目總工程師，統籌中環及灣仔填海等工程，前年佢退休後一直鮮有露面，直到數月前獲邀加入機管局擔任建築工程執行總監，職務主要係負責第三條機場跑道擴建計劃。
蔡新榮「復出」嘅任務任重而道遠，究竟之前兩年退休生活係點過呢？佢話，當時搵老友玩吓橋牌，好快就過咗兩年。又有人仲爆料話，蔡新榮連玩羽毛球都有番咁上下喎。眾所周知，未來幾年第三條跑道擴建計劃會進入關鍵時刻，蔡新榮身為有關計劃其中一個大旗手，自然要金睛火眼睇到實，唔知佢到時會否有閒情玩橋牌同打羽毛球呢？