政情：前政協何銘思登報伸冤
唔少政協、人大辛勤為國家服務，唔一定為咗追名逐利，有人係真心貢獻國家，只求國家予以認同。上星期全國政協向一百二十三名榮休嘅香港委員頒發榮譽證同紀念牌，點知引發一位老委員不滿。第六屆全國政協委員何銘思話，奇怪點解名單上無佢個名，尋日仲登報問中聯辦副主任殷曉靜點解無佢個名。
曾任新華社統戰部長
五月三十日有報章報道，中央決定向一百二十三名已榮休嘅全國政協委員頒發「榮休委員紀念牌同榮譽證」。何銘思話，從老友口中得知，佢竟然唔喺名單上，之後佢即刻打畀有關人士問個究竟啦，點知對方支吾其詞無解釋，隔咗幾日都無反應，佢先忍唔住要登報。
何銘思話，中聯辦應該還佢一個公道，如果覺得佢做錯嘢，應該講清講楚，否則唔應該將佢剔出政協呢個大家庭，仲話當年被委任做政協唔係咁易，要冒住被英國政府整治嘅風險，但佢為咗服務國家都在所不計，好希望中聯辦向佢交代清楚。
何銘思來頭不小，曾任新華社統戰部長，同已故前全國政協副主席霍英東亦非常老友，兩人相識數十載。