中環出更：肥亨國泰有緣無分
前商務及經濟發展局局長馬時亨（肥亨）當年大學畢業後，原來係想加入國泰航空工作，但獲得第二輪面試機會之時，佢最終都係選擇加入美國大通銀行，與夢想擦肩而過。尋日肥亨出席香港優質顧客服務協會嘅一個論壇時，就大爆當年冇入到航空公司，係因為收遲咗一封受聘通知書。
爭啲做咗莊偉茵「波士」
話說肥亨當年差唔多同時間寄出求職信畀銀行及航空公司，卻因為航空公司審核程序太多，結果佢先收到銀行嘅獲聘通知書，剛畢業嘅佢又求工心切，於是急急應允返工。身為前「國泰一姐」嘅中電企業發展總裁莊偉茵（Quince）尋日同場擔任演講嘉賓，二人碰面都覺得好玄妙，Quince話，如果肥亨當年加入咗國泰，可能已經做咗自己嘅「波士」喇！
一般人覺得一間公司接到「投訴」一定係負面，但肥亨同Quince就唔係咁睇，佢哋同聲同氣話，應該從投訴中改善及學習，找出對方投訴嘅原因，吸取教訓。肥亨強調，顧客係公司最重要嘅資產，留得住舊顧客才會成功。
協會主席兼大昌行集團總經理朱溢潮，為咗改善本港服務業質素，牽頭帶領本港逾五十個企業，由管理層發起「讚賞文化」，鼓勵佢哋多欣賞員工，建立快樂團隊，為服務業注入正能量。
演講嘉賓之一嘅前立法會議員周梁淑怡話，香港競爭力下降係一個警號，中國傳統向來覺得「有麝自然香」，唔着重顧客服務，依家已經不合時宜，需要改進以維持優勢。
卓妮