未來報告，報告未來，二○二六年將會世界末日！
講笑啫，大家千祈唔好當真，邊有咁容易世界末日吖，而且一次又一次嘅末日論都證明咗係百分百流料，連最多粉絲相信嘅二○一二年地球冚包散都安然無恙啦，唔使杞人憂天喎。之不過咁，二○二六年的而且確將會發生一件事，就係公務員退休潮進入高峰期，特區政府話唔定人手不足，施政品質有可能比現時更差更劣更惡頂。到時咯喎，未來新人類有機會緬懷九七回歸之後幾個不受歡迎特首，認為佢哋無能得來又幾有用，貪腐得來又幾忠直，弱勢得來又幾威猛。
即係咁，公務員事務局局長鄧國威表示，公務員隊伍將會出現愈來愈多退休人士，二○一一至二○一六每年平均有四千一百五十人退休，二○一六至二○二一增至五千六百人，二○二一至二○二六進一步增至七千人。鄧局長發表未來報告嘅用意係提一提大家，特區政府正在評估情況，研究應否延長公務員退休年齡，預計今年底或明年初完成。
未來報告發表完畢，輪到公務員出身嘅新民黨議員葉劉淑儀發表當下評論。葉劉話喎，不少政務官拒絕加入本地官場嘅「熱廚房」，試用期間已經辭職，導致政府流失大量經驗，估計同愈來愈嚴峻嘅政治氣氛有關。當然啦，鄧國威矢口否認政務官出現流亡潮，強調公務員職位仍然有市場吸引力。
香港公務員隊伍曾幾何時被誇讚為「全世界最優秀」，實際情況係咪咁呢？不如咁講啦，廉政專員公署曾幾何時亦係全世界最優秀嘅反貪部門，不過自從出咗一個醜聞纏身嘅酒鬼前專員湯顯明之後，金漆招牌搖搖欲墜咯。功夫茶相當認同葉劉，本地精英真係唔想投身熱廚房，一來避免惹禍上身，二來咯喎，鬼叫統領廚房嗰個總廚本身唔係精英咩！
簡單咁講，強將手下無弱兵，弱官手下無強吏。回歸之後嘅歷屆政府從來未曾強勢過，你話點樣吸引賢才勇闖官場聽命於弱雞當家吖？就講行政會議成員吖，一個林奮強出事，一個張震遠又出事，證明梁家軍嘅組成部分並唔係乜嘢重量級精英，難免令人產生蜀中無大將、廖化作先鋒嘅不良印象。
喂，記唔記得史上最短命局長麥齊光呀？呢位仁兄張櫈都未坐暖已經畀人拉鬼咗，若然梁朝政府擁有市場吸引力，能夠號召天下賢才奔走效命，呢種水鬼升城隍然後原形畢露嘅搞笑場面就唔會出現啦。
延長公務員退休年齡冇錯可以考慮，不過更加值得考慮嘅係提升弱雞當家嘅施政能力，否則官場中人未曾退休已玩完，嘥氣！