中央官員多次公開警告香港社會有過多政治議題同爭拗，忽略經濟民生發展，遲早被鄰近國家同內地城市趕上。日前一項有關全球競爭力嘅研究更顯示，香港由過去兩年排名榜首，連跌兩級至第三位。
不過，財政司司長曾俊華尋日喺立法會被問及有關問題時，仍然好似唔關自己事咁話，香港競爭力排名下跌，主要係受外國同本地經濟增長放緩影響，並非結構性因素所致喎。港府班財金官員有事就賴外圍，有威就自己攞，當中央官員同國際機構嘅警告係耳邊風，咁使乜用咁多公帑請佢哋呢？
