流浮山最出名係乜？相信大家如果唔係答食海鮮，就係話去年特首選舉期間發生嘅江湖飯局。亦因為呢場特別嘅飯局，令流浮山小桃園海鮮酒家叱咤一時，唔少市民都登門造訪，好似成為咗香港景點之一。去年立法會選舉後，元朗區議會主席梁志祥又被發現與一眾鄉事派喺小桃園食飯，疑係畀機會大家冰釋前嫌喎。總之，次次見到班鄉紳有飯局，都總係喺小桃園見到，話呢度唔係佢哋嘅飯堂都冇人信啦！
不過，唔知係咪呢個消息通咗天後，行蹤容易被人發現，聽聞鄉紳們最近轉咗竇。有一名跟鄉紳好老友嘅人士透露，鄉事派最近轉咗場去小桃園附近無幾遠嘅新陶園海鮮酒家搞飯局，主因係貪佢平啲喎，但究竟平幾多就唔知喇。有鄉紳自爆，好多時拉大隊去小桃園食飯，慣性埋單時都冇覆查帳單嘅。不過，唔覆查帳單，唔代表間酒家收貴咗，都要睇吓班鄉紳食咗啲乜嘅，如果食貴價海鮮就自然貴啦！
我哋翻查班鄉紳嘅「新寵」新陶園海鮮酒家網頁，佢都寫明自己係海鮮世家，仲貼咗好多幫襯過嘅名人相片添。所以究竟班鄉紳係慕名、貪平而轉場，抑或以免再被記者影到啲特別飯局而轉場，咁就只有佢哋先知喇！