政情：公民講場：四叔攬熟地叫政府執生

恒基地產主席李兆基（四叔）早前提出捐七幅農地畀政府起樓，雖然話捐地捐得咁慷慨，但如果政府真金白銀收購佢嘅農地，就唔同講法喇。好似新界東北發展計劃咁，政府都打算收購區內農地，點知四叔話收購「生地」就冇乜所謂，但「熟地」就唔應該收購喇。四叔口中嘅「熟地」，其實係指完成改變土地用途手續嘅農地，「生地」就係乜手續都未搞，難怪佢要攬住啲「熟地」啦！不過，四叔又講「生地」又講「熟地」，聽唔清楚真係以為佢講緊中藥嘅「生地」同「熟地」，「熟地」通常主治男士血衰陰虛，有補腎功效，女士就多數用寒涼補血嘅「生地」，唔知四叔平時有冇用「熟地」嚟調理身子呢？