政府最近就東涌新市鎮擴展研究進行第二階段公眾諮詢，仲將有關建議提交立法會發展事務委員會討論。委員會成員之一嘅陳婉嫻就好上心，話東涌西一帶自然環境優美，假日好多市民去燒烤，如果嗰度填海用嚟起豪宅，佢實唔會放過政府喎。不過，原來嫻姐對東涌發展咁上心，背後係有段古嘅，佢話自己十年前大病，「我身體康復都係靠由東涌行去大澳！」
嫻姐十年前因為患乳癌而做咗個手術，佢話當年做完手術之後，身體可以好番都係全靠行山。
嫻姐話最鍾意係由東涌行去大澳，因為沿住海岸行，地勢比較平坦，三個小時就行完，可以鍛煉身體之餘又唔使太辛苦，所以直到依家每隔兩、三個月都會行一轉咁話。
講起沿途風光，嫻姐就手舞足蹈。佢話每次喺東涌行山，經過紅樹林時都會見到啲彈塗魚跳吓跳吓好得意。沿途唔止有村民賣荔枝、龍眼，仲有一間老字號茶樓，佢次次都會幫襯。入到大澳，蝦膏同茶果更係嫻姐每次都必買嘅手信。
不過，嫻姐就嫌大澳文物酒店消費太貴，想喺嗰度搞活動都唔得，所以都係到此一遊算喇。