政情：查貪湯建制派放軟手腳

八個變七個 同泛民平手

雖然立法會政府帳目委員會先後三次開會公開聆訊貪湯，但似乎仲未有實際成效。有泛民議員早前就在《議事規則》捐窿捐罅搵辦法查貪湯，即使諗到喺立法會大會提交呈請書，要求成立專責委員會徹查貪湯，但喺建制派十居其九反對引用權力及特權法調查貪湯之下，專責委員會冇傳召權，形同冇牙老虎，只係幫貪湯抓痕。不過，成立專責委員會總好過唔翹埋雙手唔做嘢。

正如上述所講，雖然專責委員會並冇傳召權，但建制派為免蝕底都不得不派人加入。建制派「班長」葉國謙（阿謙）原本講過，希望委員會人數有十三人，唔好太多，建制同泛民比例就八對五。點知直到上周六截止，就出奇地有十四位議員加入委員會嘅籌備小組，但竟然係建制同泛民人數平分，即係有建制派議員甩底。

陳克勤「唔記得」加入？

原本建制派應該每個黨派都派人加入，幫手湊夠八個人，點知新早餐派嘅議員就個個耍手擰頭，最後只有經民聯派兩個人加入，自由黨亦派出鍾國斌加入。至於最多人嘅民建聯，本來亦應承派出兩人，但籌備小組名單上就只有阿謙一個。阿謙就話，原本叫咗本身係帳委會成員嘅陳克勤加入，但克勤就唔記得咗件事。不過，克勤就否認自己唔記得，截止當日已經向秘書處傳真文件申請加入，只係秘書處收唔到啫，而佢尋日亦再補交申請。

雖然建制派懶懶閒，但相反泛民就爭崩頭把握呢個出位好機會。激進派嘅泛民議員除咗有本身係帳委會成員嘅黃毓民外，社民連梁國雄亦有加入；而本身冇人喺帳委會嘅民主黨更攝咗涂謹申同單仲偕兩個人入去。所以話呢，對付敗壞香港廉潔嘅貪湯，大家唔使手軟囉！此外，帳委會今日會展開第四度聆訊，但對象係現任廉政專員白韞六，大家就要密切留意有乜關於貪湯嘅新消息喇。