中環出更：「杧果裝」會友高靜芝搶鏡
中央政策組顧問高靜芝（Sophia）向來對扮靚好有心得。日前一個下午，卓妮經過中環歷山大廈嘅一間高級餐廳，見到佢同女友人摸住茶杯底密斟。當日氣溫高達三十二度，Sophia着住件鮮黃色西裝外套，猶如一個盛夏中嘅杧果，配埋一套珍珠頸鏈及耳環，清新又搶眼。
當日下午兩點半鐘，Sophia同一名女友人坐喺餐廳近玻璃嘅雅座，邊歎茶邊傾偈。二人似乎愈談愈起勁，Sophia笑得好開懷，期間不時輕拍友人手臂，但不忘保持儀態。冇幾耐，另一位女友人姍姍來遲，Sophia即時起身俯前握手，並熱情招呼對方坐低密密斟。Sophia講嘢嘅時候，兩位女士都好留心聽，並不時點頭和應。大約十五分鐘後，Sophia有事走先，留低兩友人繼續坐。
仍熱心婦女工作
卓妮之後喺一個婦女活動遇到Sophia，離任婦女事務委員會主席已年多嘅佢，依然積極推動婦女工作。Sophia笑言，公職比正職更繁重，但盡量堅持運動，閒時會去行山減壓。
屋企兜圈當運動
不過，佢話自己一向好怕熱，夏天食完飯之後，寧願同囡囡翹住手匿喺屋企兜圈當運動，以增進感情，佢老公盧華輝就反而選擇落街散步喎。
嚟緊暑假，Sophia嘅指定動作係同兩位千金返美國探親，必做嘅事係食嘢同Shopping，事關囡囡為食，佢就鍾意買嘢，皆大歡喜。
卓妮