做人如果冇夢想，同一條鹹魚冇乜分別o架咋。既然係咁，唔想做鹹魚嘅香港人普遍有乜嘢夢想呢？講起就可憐可嘆復可悲咯，港產同胞嘅夢想十分卑微，但求三餐一宿於願足矣。
冇錯，就係三餐一宿咁簡單，並唔係乜嘢飛上枝頭變鳳凰嘅癡人說夢。可惜嘅係香港貧富懸殊嚴重到極，三餐不繼嘅草根階層大有人在，而且住屋問題長期困擾蝸居一族，宿一宵安枕無憂並唔容易做到o架。即係咁，當你唔夠錢購買或者租住私人樓宇，又冇資格申請入住公屋單位，亦都唔想折墮到瞓天橋底同流浪漢爭地盤，你剩低嘅選擇大概就係淪為劏房租客，表面上租金便宜少少，不過以呎價計你隨時豪過半山租客。
簡單咁講，香港嘅房屋政策非常之咁失敗，害到升斗市民無處容身，即使肯捱肯搏肯返工，月逗雞碎咁多人工仍然苦無立錐之地。比起豆腐膶更加豆腐膶嘅劏房應運而生，呢個現代版七十二家房客係香港繁華背後嘅貧民窟。
到底劏房數量有幾多呢？長遠房屋策略督導委員會話喎，推算全港有六萬六千九百間劏房，合共十七萬一千三百人居住。如果你以為咁嘅數量已經嚇死人，你應該睇一睇民間組織嘅講法。根據「全港關注劏房平台」嘅調查，全港有二十八萬戶劏房住客。亦即係話，官老爺低估現實情況，因為佢哋冇計算工廈變劏房、教堂變劏房甚至地舖變劏房嘅騎呢現象。你知啦，三餐一宿得來不易嘛，宿位求過於供咪搞到劏房遍地開花囉。
「東方報業民意調查」顯示，三成六受訪者認為政府低估劏房數字；兩成八覺得政府日後應該推行更詳盡統計；兩成四批評抽查比例少不準確。
劏房類別五花八門乜都有，連唔係住宅用途嘅地舖都有劏房，三成八受訪者認為反映房屋政策失敗；三成四覺得劏房問題愈來愈嚴重；一成九直指劏房亂象不容忽視。
唉，所以真係難怪蝸居一族滿肚怨氣o架，工又有返，稅又有交，點不知到頭來乜鬼嘢福利都冇，迫於無奈租住轉個身都有困難嘅劏房，仲要為火燒連環屋嘅消防問題擔驚受怕。土瓜灣劏房燒死幾多人呀？花園街劏房又燒死幾多人呀？蝸居劏房宿一宵完全唔可以話係安枕無憂囉，該煨！
不如咁講啦，當局終於願意統計劏房數量都算係好嘅開始，即使計錯數都勝過唔計數。家陣有一定數據嘞，下一步必須千方百計改善住屋問題，否則蝸居一族怨氣愈來愈重，忍無可忍嘅時候隨時爆大鑊o架，無瓦遮頭嘅貧窮大軍佔領禮賓府就唔好啦。