早前內地網絡先後爆出兩單學生哥談戀愛嘅相關新聞，一時間成為全城熱話，大家始關注學生談戀愛問題，其實不少中學生拍拖熱戀，已成不爭事實，現在至嚟探討解決方法，似乎遲咗好多！
其中一單新聞嚟自武昌，話說有師奶向報館投訴，小區附近出現「早戀巷」，只要一到晚上六七點，就會有好多身穿校服嘅學生情侶出沒，一對對攬到實一實咁嚟談心，啲師奶見到自然唔順眼，於是搵記者嚟踢爆。記者深入現場，發現整條不到五十米嘅巷子，出現十多對情侶，記者本想訪問佢哋，但又怕群情洶湧，於是訪問走過巷子嘅其他學生，佢哋嘅答案竟然話完全可以接受，最後更喺某中學做問卷，發現有四成人有拍拖經驗，數字真係唔簡單。
至於另一則新聞在浙江台州，因為學生談戀愛嘅情況嚴重，有某中學定咗「男女生交往過密判定細則」，共有八點，分別係不准擁抱、拖手、攬腰，更不准單獨相處、一齊食飯，互相餵飯，同埋由一方帶飯，最後連送返屋企或課室門口都唔得，如果在學校干犯，就要受罰。細則刊出後家長們自然拍手，但就引起學生同網友嘩然，認為中學生談戀愛已經係不爭嘅事實，要教導嘅只係正確嘅戀愛觀，而唔係高壓手段同禁止。