六四前後，對一眾建制派嚟講都係考驗，講啲乜、高調定低調，都要諗過度過。尋日一批建制派跨黨派嘅中堅第二梯隊就靜雞雞飛咗去北京，到六月七日至返香港。唔通呢班熱血建制青年驚講錯嘢，所以要不在場？
我哋收到消息，尋日好幾位建制派青年都不約而同離港北上，佢哋包括民建聯周浩鼎、自由黨李梓敬、新民黨甘文鋒等，佢哋共通點都係成日喺城市論壇發言，曝光率都算幾高，都係黨力捧嘅新一代。我哋問過周浩鼎，佢就話今次北上之行只為公務，希望大家唔好諗多咗，而李梓敬就話今次係北上交流，但同咩人交流就無講，令呢次北京之行更加神秘。
按照以往經驗，如果建制派齊齊上北京，都離不開到國家行政學院上堂，或者拉大隊見各部委，但今次上京咁神秘，唔通要六四前後「隱形」避表態？不過有政界中人話，要避開對六四表態其實唔難，只要嗰幾日唔開電話就得，所以不必諗多咗，估計今次之行都係交流性質重於一切。不過跨黨派一齊去，唔通佢哋原本就係一家人？