政情：有相為證：「成」身輕鬆晒

前立法會建築、測量及都市規劃界議員劉秀成，今屆退出之後專心做番建築師本業，近日更出任香港聯合國教科文組織協會會長，忙碌度不遜從前。尋日佢忙裏偷閒，同太太入沙田馬場拍吓拖，期間兩公婆仲撐枱腳食晏，好溫馨。劉秀成話，雖然已經冇做議員，仍不時約啲前同僚出嚟見吓面，打聽吓議會消息。講到現屆立法會，佢覺得入面太多戾氣，又拉布又多爭執。反觀佢望落精神不少，睇嚟真係唔做議員一身輕。