政情：林筱魯向市建局耍手
被譽為特首梁振英（CY）頭號得力助手嘅張震遠上月因為商品交易所捲入虛假文件案，宣布辭去所有公職，包括行政會議成員同市建局主席等身份。官場隨即興起一股「猜猜誰是下屆市建局主席」遊戲，熱門人選包括啱啱退休嘅前行政總監羅義坤、前市建局執行董事林筱魯以及城規會副主席黃遠輝。林筱魯素來被視為梁營一分子，CY競選時更曾經邀請過佢撰寫規劃政策，如果CY想繼續搵「自己人」執掌市建局，相信林筱魯將會係不二之選。
不過林筱魯尋日出席活動時直截了當否認傳聞，話自己現時已經身兼多項「非常重要」嘅公職，而由於公眾對此有唔少期望，所以除非佢覺得有足夠精力同能力再擔任其他工作，否則都係寧願專注於目前公職好過。
唔評論繼任人選
至於當局有冇搵過佢出任市建局主席，林筱魯就無厘頭話自己喺不同崗位都有同政府溝通，又話自己已經離開市建局一段時間，所以唔可以評論對繼任人選嘅要求。可能人選嘅名單上刪去一人，猜謎遊戲繼續。CY話張震遠喺行會嘅空缺唔需要填補，但係市建局方面就唔得嘞。