政情：與行會溝通 政策局表現參差
特首梁振英（CY）要求佢嘅團隊有政治能量，仲要令行政會議非官守成員喺政策醞釀初期可有更多參與。不過一眾行會成員上任近一年，不時有行會成員透露自己都係政策快到行會討論至知。行政會議召集人林煥光（WK）尋日出席電視台節目時，唔肯評論行會改革進度。佢話雖然部分政策局現有定期邀請行會成員食三文治、開午餐會簡介政策，但當中就表現參差，又點名話運輸及房屋局做得比較積極。
究竟係邊個政策局咁唔積極，唔請行會成員食三文治呢？WK尋日無講出口，但就分階段將嫌疑範圍收窄。
先係節目上點名話運房局同佢哋嘅午餐會做得密啲，喺節目後再講，其實大部分政策局都好配合，行會成員喺環保、房屋議題上亦得到局方配合，雙方不時開會討論，仲「跟得好貼」，又話期望行會可就十五年免費教育及退休保障等較長遠嘅政策多作討論喎。睇嚟佢好想教育局同勞工及福利局請佢食三文治喎。
想食教局勞福局三文治？
教育局局長吳克儉尋日下午出席一個活動後，對於記者有關提問好似聽唔到咁，耷低頭就走。食物及衞生局局長高永文嘅回應就積極得多，話既然有行會成員指出政策局參差，咁就一定有改善空間，局方未來必定會更積極爭取向行會同立法會解釋政策。
不過行會成員新民黨葉劉淑儀就覺得，要加大行會成員參與政策制訂呢支歌仔由港英時期已經有人講，不過要真正要做到係有難度，事關行會成員只是兼職同埋做吓顧問角色，無可能要求行會成員做到半個局長或副局長嘅角色。
提到CY腰痛，WK就話只係傳聞，仲話CY「似乎應該仲係好fit，鬥志仲好旺盛」，而行會成員個個身經百戰，會繼續做好自己嘅崗位。對於張震遠要辭去行會等公職，WK話行會成員都感到惋惜同遺憾。張震遠事件引起社會討論行會成員嘅利益申報問題，WK話佢自己做過三屆行會成員，認為以今屆申報制度最嚴謹，但申報制度要與時並進，就算檢視制度，亦無可厚非。