中環出更：陳振彬帶挈 陳甘美華初嘗拉頭馬

適逢Bunny係十八區區議會當值主席，可謂主場得利。佢話贏過咁多次馬，今次贏得最滿足，事關賽前佢叫晒十八區老友，每人至少買二十蚊獨贏捧吓佢場，結果個個有錢分，紛紛同佢碰杯講多謝。Bunny話，佢會將贏得嘅近四十萬元獎金，全數捐晒畀公開大學，支持大家終身學習。

林鄭來去匆匆「好餓得」

尋日仲有一場「家是香港盃」，政務司司長林鄭月娥都有入場擔任主禮嘉賓。出晒名勤力嘅林太，行勻會場二十五圍枱逐枱握手合照，之後忙住頒盃後匆匆離開，放喺枱上嘅牛扒幾近原封不動。睇嚟佢唔止「好打得」，仲「好餓得」。

林鄭月娥（前排右一）同陳甘美華（前排左二）無論外貌、衣着同神情都有幾分似。圖中前排右二為元朗區議會主席梁志祥，前排左一為馬會大董周永健。

身為博彩及獎券事務委員會成員嘅前仁濟醫院主席董吳玲玲（中）帶埋囝囝董必政（左）入場湊熱鬧，與同樣係前主席嘅荃灣區議會主席陳耀星（右）相見甚歡。（溫國佳攝）

林太同陳太兩位女強人同場現身，無論髮型、衣着、笑容，都有八成似，企埋一齊儼如兩姊妹。卓妮笑問陳太，有冇人試過撈亂佢哋兩個？陳太反問：「你覺得呢？」之後再問Bunny覺得似唔似，Bunny笑住答：「我都覺得好似喎！」又話兩位都係勤力嘅優秀公務員。陳太即巧妙地指住「家是香港」嘅襟章話，大家係香港人，所以咪似一家人囉！

卓妮