有人形容港產官僚好似四方木咁，踢一踢至郁一郁，真係一啲都冇錯o架。呢，去年十號颱風韋森特襲港，摧毀數以萬計樹木，事隔一年，仲有大量枯樹未被清理，依家颱風季節又來臨，危機四伏，隨時樹滾人亡，你話係咪離譜吖？好嘞，經過東方報業集團踢爆，再畀功夫茶鬧醒，港產官僚終於識郁，尋日急急派人清理，都唔知好笑定好嬲。
件事係咁嘅，去年颱風韋森特吹襲期間，好多樹木被連根拔起，淨係重災區大埔汀角路怡雅苑對出嘅一幅斜坡就有唔少大樹倒塌，其中十幾個枯樹頭遲遲未移除，樹洞亦未填平。由於上址遊人如鯽，又有學校又有巴士站，加上家陣已經踏入風季，萬一小樹洞被雨水侵蝕而變大，分分鐘引致山泥傾瀉，而枯樹頭更可能滾落山坡，造成人命傷亡，唔係講笑o架！
事件經本報踢爆後，當局仲未有即時反應，直到尋日功夫茶忍唔住怒斥官僚懶惰，路政署先至死死氣派人補鑊，除咗神速清理枯樹頭，仲將留低嘅樹洞填平及鋪上墨綠色鐵絲網添。你話喇，如果唔係東方報業集團為民請命，當局會唔會做嘢呢？如果唔係功夫茶當頭棒喝，港產官僚又識唔識郁呢？正如有區議員話齋，唔係傳媒揭發事件，路政署依家可能仲係闊佬懶理，罔顧市民安全。
始終都係呢句，官僚靠得住，豬乸會上樹。港產官僚其實唔係唔識做嘢，而係抱着多做多錯、少做少錯、唔做唔錯嘅心態，懶惰根本就係佢哋嘅通病。呢嗱，當局興建新政府總部，效率一流，眨吓眼就落成；而清除十幾個枯樹頭，居然拖足一年，而且仲要畀人踢至識郁。兩件事嘅分別就係，新政府總部係為高官享受而興建，佢哋梗係緊張喇，至於清理枯樹頭咯喎，唔會影響到佢哋自己，咪關人個關囉，你話港產官僚幾咁自私吖。
所以話，「香港勝在有ICAC」應該改為「香港勝在有正義傳媒」至啱。唔係咩？家陣政府無能，政客無良，大家都不務正業，敷衍塞責；加上行政、立法、司法互扯貓尾，互拖後腿，搞到香港烏煙瘴氣，七國咁亂。如果唔係靠正義傳媒發揮第四權功能，監察政府，點止枯樹冇人清理，連貪曾及貪湯嘅貪腐醜聞都永無水落石出一日添吖。
計功夫茶話齋，香港乜都可以冇，但絕對唔可以冇新聞自由。香港嘅廉政及法治已經畀貪曾及貪湯破壞得七七八八，如果連新聞自由都冇埋，港產官僚冇人監察，隻手遮天，為所欲為，咁就同內地冇乜分別嘅喇！