立法會議員及區議員作為民選代表，一舉手一投足都備受關注，但過去唔係經常傳出醜聞，就係宣傳橫額及單張寫錯字，話口未完，近日又發生一單喇！有心水清嘅網民喺社交網站分享咗一張相，話發現「雙料議員」葛珮帆（EQ）近日喺地區懸掛嘅宣傳橫額，竟然串錯咗自己個英文名「Elizabeth」，寫多咗個「i」字，變成「Eliizabeth」，仲嘲笑枉EQ仲自稱係博士喎！
EQ回應查詢時話，已從街坊口中得知橫額串錯名，並即時收番所有橫額，總共涉及五十多幅橫額咁多。佢承認，今次純屬無心之失，但事實上係做得唔好，所以要對市民講聲唔好意思，而負責今次工作嘅地區同事已好唔開心，所以希望大家見諒。EQ仲話，平時地區印製宣傳橫額或海報，會交由地區同事負責，佢亦好少親自覆檢。不過，自今次事件後，EQ話會親力親為睇實，小心謹慎啲。
咁一次過又換咁多橫額咪浪費好多錢？EQ話，都唔會嘅，因為佢哋啲橫額會定期更換唔同嘅議題喎。雖然EQ已收回有錯字嘅橫額，但呢張問題橫額已喺網上瘋傳，相信網民嘲笑之聲仍會持續一段時間。