政情：詠藜園為長者團體籌款
明朝皇族御用嘅「皇爺粽」同「太妃粽」，大家將有機會品嘗到，仲可以做埋善事添。以四川擔擔麵聞名中外嘅詠藜園，首次推出呢對一鹹一甜嘅靚糉，命名為「長情粽」，將賣糉所得嘅近八成收益撥捐畀長者安居協會，支援其「平安鐘」及「隨身寶」服務，目標係賣出一萬隻。
公開明朝御用秘方
詠藜園董事長楊王小玲、策劃推廣總監張煒、長者安居協會總經理關雪梅等尋日齊齊現身宣傳活動。據介紹，「皇爺粽」係以八種香料醃製五花腩嘅鹹肉糉，綿滑不膩；而「太妃粽」則用天津紅豆造成豆沙甜糉，清甜輕怡。聽落材料好簡單，但楊太話愈簡單愈難做好，所以連月來反覆試味，自己仲因此增磅添！
楊太憶述，楊家祖先係清朝御廚，手持由明朝傳落嘅靚鹹糉秘方，但從不外傳，每次只做數十隻送贈親友。直至去年其父親離世，佢頓覺生命無常，故公開秘方做善事幫助有需要長者，並鼓勵年輕人多關愛雙親。至於取名為「長情粽」，楊太話係代表佢支持咗長者安居協會十多年咁長情喎。佢透露家翁亦係「平安鐘」長期使用者，感覺良好，所以想多啲長者受惠。