政情：吵鬧立會最佳教材
立法會推出新教材套，介紹新一屆立法會運作，不過成份教材只係圍繞立法機關歷史同日常運作，反面教材完全欠奉，中小學生接觸到呢啲河蟹教材，就好難睇到立法會係嗌交多過開會喇。既然製作教材套係希望為學校提供「與時並進」嘅教學資源，咁不妨加插尋日內務委員會會議上，議員蔣麗芸（Ann）大戰黃毓民嘅精彩片段，等中小學生知道嗰啲尊貴議員經常做埋啲無聊事。
大舊樹根做架樑
尋日內會首先討論由毓民要求喺大會上「打尖」討論向主席曾鈺成提出不信任動議一事，泛民主派輪住發言支持。不過，阿Ann就話，相信市民嘅眼睛係雪亮嘅，又話主席已經畀拉布議員足夠發言時間，反問拉布議員「如果你哋話唔夠（時間），咁要幾多先夠呢？」毓民聽見即時火起，批評建制派議員發言九唔搭八，「話你有幾垃圾就幾垃圾，話你有幾膠就幾膠」，又大鬧阿Ann「都唔知自己講緊乜」、「我一陣就慢慢教訓你蔣麗芸，你連法律都未識，人講你又講」，結果激到阿Ann嬲爆爆。
過咗幾分鐘，阿Ann突然行近毓民身邊，指手畫腳好兇狠咁講咗幾句後就拋低一句「你夠膽就放馬過嚟！」毓民就大聲反駁，話自己從來都冇講過阿Ann個妹妹蔣麗莉，唔明阿Ann點解要咁講喎。之後就到阿Ann提出要求喺大會提出解除毓民同陳偉業（大舊）職務嘅議案。大舊就話歡迎阿Ann提出動議，佢哋一定會捲土重來再次參選，變相啟動公投程序。不過，街工梁耀忠同法律界郭榮鏗就質疑緩刑未必符合罷免條件，要求法律顧問解釋動議係咪合憲。
此時，阿Ann嘅黨友鍾樹根就幫口話，毓民同大舊真係犯法，先提出罷免啫，已問過法律顧問意見啦，質疑泛民點解仲話要諮詢法律意見。不過阿Ann最後都係決定暫撤回議案，等法律顧問釐清相關法律問題。大家講足兩個鐘頭，結果都係決定擇日再議。呢個正正就係反面教材，話畀啲中小學生知道，立法會係點樣浪費時間同公帑，好過淨係講埋啲悶嘢啦！