中環出更：邵信明扒浴缸少林武僧助拳
昂坪360董事總經理邵信明，平日坐高空纜車就坐得多嘞，但本月廿三日佢會轉戰海上運動，事關佢已經報名參加香港國際龍舟邀請賽其中一項「名人扒浴缸比賽」，而香港迪士尼樂園度假區行政總裁金民豪同海洋公園主席盛智文等人亦都會同場較量。邵信明尋日出席龍舟賽記者會時，就率先公開自己嘅參賽秘密武器，唔止保證唔會反「缸」，仲講笑話就算對手出動海豚做隊友都冇有怕喎。
原來邵信明口中嘅秘密武器，就係佢邀請咗暑假會到昂坪360表演嘅少林武僧做隊友，所以對比賽充滿信心。佢希望武僧到時會展示輕功水上飄嘅功力，將浴缸輕易咁「飄」去終點線，仲笑住話最想自己可以坐喺後面印印腳坐享其成。當日比賽除咗設有冠、亞、季軍之外，仲有「特色造型大獎」，惜髮如金嘅佢就唔肯削髮襯番隊友，但就話已經密鑼緊鼓咁準備當日嘅服裝，到時一定會畀到驚喜大家喎。
