洗地水淹民居 房署塞責
公屋走廊「逢洗地必浸」，令住戶有家歸不得。葵盛東邨有公屋樓層過去一年每逢洗地或清潔日例必水浸，房屋署雖早已知悉問題，卻一直未作正視，竟稱因「洗地水過多」造成淤塞，直至本報介入事件後始更換喉管，遭區議員踢爆平日疏於檢查，出事後仍「擘大眼講大話」。立法會議員則指房署管理不善，令居民長期飽受不必要滋擾，要求改善管理質素。
鄭女士居於葵盛東邨盛樂樓中層單位，去年五月起，即發現走廊每逢洗地或清潔日均嚴重水浸，由於其他樓層未有水浸情況，懷疑事件與喉管淤塞有關。「都唔知係咪條渠塞咗倒灌，我個單位仲要喺正個去水位隔籬，洗親地啲水都浸到上門檻，等啲水退咗仲要抹乾淨道鐵閘，真係辛苦過乜！」記者曾實地視察，發現只需在涉事樓層的去水口傾倒一盆半水，即出現倒灌情況。
求其睇吓就算
鄭女士坦言每遇水浸即不勝其擾，「喺屋企就出唔到去，出咗街就返唔到入屋」，雖曾向房署反映，卻未見改善，「水浸問題房署一路闊佬懶理，次次投訴完就搵人求其睇吓就算！」
葵盛東邨物業服務辦事處發言人表示，今年三月獲悉有關情況後曾即時安排技工通渠，認為情況已有改善。惟早前洗地期間疑因大量洗地水湧入去水渠引致淤塞，現已更換整條去水渠，並督促清潔承辦商清洗走廊時避免將大量洗地水排入去水渠。
「房署講大話！淨係污水又點會塞到水浸，換喉嗰日我都喺現場，好清楚睇到條喉入面塞滿晒水泥，擺明就係平時冇認真檢查！」一直跟進事件的當區區議員周偉雄怒指房署的回應與事實不符，又認為喉管淤塞本屬小事一樁，卻擾攘一年，直至傳媒介入才獲處理，足見房署敷衍塞責。周表示，除盛樂樓外，邨內其他樓宇亦有同樣情況，要求房署盡快全面檢查。
立法會房屋事務委員會主席王國興亦對房署的回應表示質疑，「公屋去水渠係應該要有足夠承受力，如果話多污水就塞，咁就更加唔合理！」王批評房署作為大業主，卻常抱「頭痛醫頭、腳痛醫腳」的態度處理居民投訴，未有及早徹底檢查涉事設施，致事件擾攘多時，令居民飽受不必要滋擾，要求當局做好定期檢查工作、改善管理質素。
記者：詹海萍、徐少琴