大樹竟然識殺人，本來係聞所未聞，不過光怪陸離嘅香港乜嘢奇事都會發生，所以過去五年先後有三個人死於大樹倒塌之下，另外有六個人受傷。最轟動嘅一宗大樹殺人事件發生於二○○八年，赤柱有一棵頹然倒下嘅病樹刺桐，將一名十九歲香港大學女生壓死，死得不明不白，死得冤哉枉也，死得我見猶憐。
功夫茶因乜事幹舊事重提呢？原因係大樹殺人事件唔排除陸續有來，鬼叫本地官僚對於潛在危機置諸不理，間接成為殺人幫兇咩！
呢嗱嗱嗱，千祈唔好以為功夫茶講得太誇張呀，五年以來三死六傷嘅慘痛教訓絕對唔可以等閒視之。大家睇睇大埔汀角路怡雅苑對出一幅斜坡吖，附近係聖潔會靈風中學，斜坡對落係巴士站、行人路以及單車徑，平時人來人往o架。呢一個斜坡危險之處就係在於枯樹隨時滾落街！
即係咁，舊年七月颱風韋森特橫掃香港，狂風暴雨肆虐期間有數以十萬計樹木被摧毀。十號風球事隔差不多一年嘞，大量連根拔起嘅枯樹居然仍未徹底清理喎，樹洞亦都未悉數填平。土力工程處前任處長兼香港工程師學會候任會長陳健碩警告，斜坡一個小樹洞如果完全冇遮冇掩就可能係大危機，因為小樹洞會被雨水不斷滲透侵蝕而變大，最壞嘅情況係引致山泥傾瀉。
喂，萬一發生山泥傾瀉，後果可大可小o架，大吉利是死傷枕藉邊個負責呢？樹木專家兼環保團體長春社總監蘇國賢亦有意見，佢話政府部門為咗解除風災危險而切除樹幹無可厚非，不過殘留嘅枯萎樹頭應該盡快移除，再種植新嘅樹木，否則就係助長潛在嘅殺人危機，畢竟枯樹幾時滾落斜坡真係冇人知。
簡單咁講，事隔一年嘅颱風遺禍尚未清理，枯樹未移除，樹洞未修補，你話係咪有機會再有路人甲乙丙死於大樹之下吖！
所以話啫，官僚主義真係害人不淺o架，特區政府明明因應大樹殺人事件而設立咗一個樹木管理辦事處，美其名管理樹木，實際上形同虛設。同樣係舊年七月颱風韋森特橫掃香港，尖沙咀栢麗購物大道一棵古樹被吹倒，壓傷五名男女途人，樹木辦事前完全冇發覺嗰棵樹有倒塌嘅危機，簡直激到你吹鬚睩眼。
咁講啦，第一次大樹殺人勉強可以話係意外，第二次就已經唔係意外，而係負責管理樹木嘅失職官僚靠害。唔該官老爺盡快良心發現，及早清理危機四伏嘅枯樹啦，今年風季即將來臨喇，若然有枯樹滾下滾下仆落街，一個二個途人淪為樹下Poor Guy，殺人幫兇好「不該」啫！