香港人口不斷增長，無論喺區議會或立法會選舉，重新劃選界都係事在必行，但點樣劃法先至係重要問題。正因為呢個原因，二○一五年區議會選舉未開始劃界，二○一六年立法會選舉嘅劃界建議亦已滿天飛，當中尤以劃出新界北嘅方案最受關注。近日又再傳出「騎呢」新劃界建議，就係分別劃多兩個新界北及新界西北選區，唔知呢個方案對邊啲人較為有利呢？
其實新界北劃分方法已有唔少人提過，早前有人提議將大埔、北區及元朗劃為新界北，其餘本屬新界東或新界西嘅區域維持不變。之後又有人建議只將北區、元朗及部分屯門或部分大埔劃出嚟結合做新界北。不過，最新嘅建議係將元朗嘅新田及錦田分割開來，與北區結合，變成新界北；而餘下嘅元朗部分就併合屯門區成為新界西北選區。
驟眼睇兩個新選區似乎各區面積都幾平均，但如果真係咁分，就肯定影響到元朗鄉事派嘅勢力分布，同時又拆散咗元朗區議會。不過，如果按有關方法分界，兩區嘅人口數目係唔夠數嘅，所以相信機會唔大。