教育局局長吳克儉去咗南韓外訪，留低副局長楊潤雄（Kevin）出席尋日立法會教育事務委員會會議，向議員講解新高中學制嘅檢討進度。本來大家都想睇吓AO（政務官）出身嘅Kevin可唔可以一洗局長「唔得掂」嘅花名，點知佢講唔夠幾句，議員葉劉淑儀就好似食咗火藥咁批評依家嘅教育制度千瘡百孔，又鬧Kevin唔係做教育事務出身，答問題「照稿讀」，只係局方嘅扯線公仔。
葉劉鬧完一輪，依然怒氣未消，繼而將矛頭轉向Kevin隔籬嘅副秘書長陳嘉琪。葉劉翻舊帳話，以前曾經向陳嘉琪反映過依家學生嘅語文水平唔掂，叫局方諗諗計，點知當時陳嘉琪回應一句：「唔係個個好似你個女咁叻！」此話令葉劉一直記到依家，尋日仲喺會上忍唔住話，未見過有高官咁傲慢。陳嘉琪見勢色唔對，即時擰晒頭話唔係咁嘅意思，可惜葉劉都唔想再聽佢解釋。
葉劉仲話，依家新高中學制下，學生中文又唔掂，中史、西史又唔識，要教育局好好反省。議員鍾樹根又加把嘴，話學生目無尊長，又有好多學生上街，甚至連愛國學校都出現「學民思潮」成員，認為當局要負上責任喎。