政情:無錫建櫻花林 球伯浪漫紀念亡妻

有「製衣大王」之稱嘅長江製衣創辦人陳瑞球(球伯),不但熱心公益,仲係一位情深義重嘅好丈夫。去年三月球伯嘅太太林滿珍不幸仙遊,為憶故人,球伯特別喺江蘇無錫興建一個櫻花林,以求望廬思其人,認真浪漫。

城大建築物「冠名」支持

據球伯嘅女兒、中華廠商聯合會副會長陳淑玲(Shirley)透露,佢父母結婚六十多載,一直以來都係百般恩愛。由於媽咪生前好鍾意櫻花,所以當佢身故之後,爸爸決定興建一個遍植櫻花嘅公園。由於香港嘅天氣太熱不宜櫻花生長,所以選擇緯度跟日本相若嘅無錫,覓地栽種大批來自日本嘅櫻花,並且將公園命名為「滿珍林」。Shirley話,今年四月曾陪同爸爸一齊到訪滿珍林,適逢櫻花綻放滿園春色,確有一種如睹至親嘅感受。

除咗無錫,球伯喺香港亦有紀念亡妻嘅舉措。話說城市大學為表揚球伯多年來嘅支持,尋日就將歌和老街學生宿舍區內一幢建築物,冠名為滿珍綜合禮堂。城大校長郭位話,滿珍綜合禮堂旁邊就是以陳瑞球命名嘅學生宿舍,寓意佢哋夫妻兩人有影皆雙。城大咁有心思,球伯開心之餘,仲聯同十多位家人一齊出席命名儀式,場面熱鬧。

第一手消息請下載on.cc東方互動iPhone/iPad/Android/Windows Phone Apps

王俞