政情：雙刃刀 箝制謝偉俊
立法會議員謝偉俊（Paul）言行出名飄忽，好似早前接受電視台訪問時自爆喺選舉中獲西環助選，結果惹來唔少投訴同微言，要求監察阿Paul嘅呼聲不斷增加。據聞監察重任近日落咗喺身兼港區全國人大代表嘅觀塘區議會主席陳振彬（Bunny）身上，佢將於六月網羅約三十名獨立區議員組成「創建動力」，有人形容呢個新政團係「雙刃刀」，如果阿Paul表現對辦自然加以輔助，否則可能另覓賢能取而代之。
阿Paul去年九月成功由旅遊界功能界別轉戰九龍東直選，關鍵係得到九龍東內獨立區議員力撐。據聞呢班獨立區議員將會再度升級轉型，短時間內成立新論政團體「創建動力」，由Bunny擔任主席，黃大仙區議會副主席黃錦超、觀塘區議會副主席蘇麗珍等四人出任副主席，佢哋嘅大本營將設於觀塘某工業大廈。
陳振彬組「創建動力」
究竟「創建動力」點解會誕生呢？主要有兩個原因，其中表面係想整合九龍東嘅勢力。消息人士話，九龍東本身有好多社團同組織，其中最為人熟悉係東九龍居民委員會及觀塘創建聯盟，兩個團體分別割據黃大仙同觀塘區，不分政黨招攬所有建制派區議員加盟，好處係可以一致行動，唔好處係部分區議員有政黨包袱，因此「創建動力」講明只招攬獨立區議員加盟，估計合共有三十一人，係繼民建聯同民主黨後嘅第三大勢力。
隨時踢阿Paul出議會
至於暗中原因就係睇實阿Paul表現，消息指有曾力撐阿Paul上位嘅九龍東獨立區議員，對於阿Paul過去八個月喺立法會難以捉摸嘅表現都有微言，為咗加強制衡同監察作用，「創建動力」嘅成立名義上可更好向佢反映民意，阿Paul表現對辦，冇做出任何有逆民意嘅言行自然係皆大歡喜，否則「創建動力」亦可以展示實力，最壞嘅情況係另覓賢能取代阿Paul個立法會議席。
至於即將「被監察」嘅阿Paul就回應話，唔覺得自己被人「睇實」，如果講到監察，全港市民都可以監察佢嘅工作，佢強調同九龍東嘅獨立區議員都係志同道合嘅好友，大家互相幫助喎。