政情：馬陳家歡腳傷 照撐粵劇籌款
活潑好動嘅東華三院副主席馬陳家歡（Katherine），月前打羽毛球時不慎拉斷右腳筋，經手術接駁後，要打石膏休養。不過，佢為撐東華粵劇籌款活動，日前寧願戴住腳套都要現身。
打羽毛球都會扭斷腳筋，Katherine都話冇諗過會咁嚴重，後悔當日熱身不足，當聽見「啪」一聲，感到一陣痛楚，原來後腳筋已斷咗。幸好佢身體一向壯健，打完一個月石膏，康復神速，近日已經可以撐住拐杖慢慢走路，但每天仍需做物理治療，學習重新行路。要重拾昔日健步如飛，睇怕要等多四個月喇。
單腳跳得多竟減磅
在家養傷嘅日子，Katherine話反而瘦咗，事關右腳傷咗，用力全靠左腳，不時用左腳單腳跳。而佢跳得多，竟然減埋磅。雖然抱恙在身，Katherine不忘為六月初舉行嘅《南唐李後主》慈善粵劇晚會擔任籌委會主席，落力呼籲戲迷買飛。原來佢幾年前愛上睇粵劇，驚覺中國古典文學詩意十足，愈睇愈過癮喎。