政情：署長孫德基買衫也審計
專職揭發政府大花筒陋習嘅審計署署長孫德基（David），曾經係全球四大會計師行嘅高層，大半生投身會計師行業，唔使多講，佢睇數肯定叻過人。大前日午飯時間，卓妮見到David喺金鐘太古廣場一間運動用品店出現，期間被一件黑色運動恤深深吸引，駐足良久仔細端詳，但最後都係空手而回。點解？原來佢嫌件衫要價超過八百元太貴喎！
本周二中午大約一點四十分，David趁食飯時間偷閒購物，但佢全程只係拎起一件黑色短袖衫，仲用咗幾分鐘仔細閱讀功能介紹內容。
件衫集齊多項新科技，聲稱可以防紫外光、保暖兼快乾，仲可以促進血液循環，從而提升運動表現。咁多功能，售價自然唔平，每件售價為八百一十元。David幾經掙扎，結果都係冇買到，兩手空空離去。
月入十幾萬 800蚊嫌貴
卓妮上前同佢打招呼，David笑稱件衫太貴，又唔知功能係咪真係咁勁，都係諗諗先喎。唔講唔知，David好鍾意跑步，讀大學時已經養成跑步習慣，保持至今已近四十年。佢朝朝六點幾就喺半山住所寶雲道一帶，跑足八公里、歷時四十分鐘，一星期至少運動四日，認真有恒心。
話時話，David加入官場之前做咗三十幾年會計師，收入豐厚，依家嘅職位月薪都有十幾萬元，普羅市民就可能覺得件衫賣八百元好貴啫，但係連David都呻貴，唔通佢揭發政府大花筒弊病揭得多，所以變得慳家，連買件戰衣都要衡工量值、審計過關至得？