杜鵑花開，騰雞節來，因乜事幹姹紫嫣紅嘅杜鵑花又叫騰雞花呢？原因係每年三四月杜鵑花開嘅春華時節，學生哥都騰騰雞雞忙於溫習功課，準備五月施展渾身解數迎戰一科接一科嘅公開試。當然啦，五月開花紅彤彤嘅鳳凰木同樣叫做騰雞花，其中嘅意思一脈相承。
好嘞，埋頭苦讀嘅學生哥通常會去邊處騰騰雞雞溫習功課呢？最理想嘅環境梗係自己嗰個高床軟枕嘅屋企啦，奈何香港居住空間狹窄到冇朋友，最新統計有十七萬人蝸居劏房，一家大細嘈喧巴閉好難令人安心讀書囉，所以公共圖書館就成為兵家必爭之地，佔據有利位置默默耕耘係學生哥最普遍嘅指定動作。
不過勢估唔到，本地圖書館原來空氣質素不敢恭維，冇辦法為學生哥提供舒適嘅讀書環境之餘，更加有可能令人眼皮沉重瞌眼瞓，甚至最壞嘅情況係損害健康呀，衰鬼！
機電工程署聘請嘅顧問測試發現，至少七間公共圖書館嘅空氣質素不合格，深水埗元州街公共圖書館更加係混混濁濁嘅重災區，二氧化碳超標六成，細菌含量超標四成，總揮發性有機化合物超標兩成。至於天水圍北公共圖書館，二氧化碳同細菌含量亦係嚴重超標，真係唔得你死。
喂，香港室外空氣污染已經得人驚啦，無力扭轉乾坤嘅官老爺有時會退而求其次，呼籲市民盡量留於室內，又唔好做劇烈運動諸如此類。家陣室內嘅圖書館居然烏煙瘴氣，你叫小市民點算好呢？專家話呀，市民逗留喺二氧化碳同細菌含量過高嘅圖書館，會感到疲倦以及昏昏欲睡，細菌以及總揮發性有機化合物會引發咳嗽甚至影響肺功能。
唉，康文署都唔知做乜嘅，白逗人工疏忽職守，公共圖書館肯定係長期缺乏維修保養啦。空氣質素不合格其實仲有一個潛在危險o架，萬一肆虐神州嘅禽流感傳入香港，空氣唔流通容乜易導致交叉感染o架。所以立法會議員王國興講得啱嘞，應該更換有關嘅冷氣系統，並且應該訂立定期清洗嘅計劃。
講開又講，香港整體嘅空氣質素幾時先至有改善呢？就算公共圖書館唔係咁空氣混濁，學生哥喺其他地方讀書都會有問題喎，唔通你叫佢哋戴住氧氣罩挑燈夜讀咩？考試嘅時候莫非又要一個二個戴上怪模怪樣嘅豬嘴？唔好玩啦，醜死怪呀！
前特首曾蔭權唔止貪腐成性，更加有一個外號叫做「氣候逃犯」，功夫茶求神拜佛，現屆政府千祈唔好遺傳呢一個罔顧空氣質素嘅陋習。即係咁，圖書館固然有必要改善空氣質素，其實維港上空更加應該撥開雲霧見青天，否則當今梁朝同樣千夫所指！