俗語有話「人怕出名，豬怕肥」，有錢人一旦成為公眾人物，就容易被騙徒盯上。早前東華副主席李鋈麟就被可疑媒體假借內地官方報章名義，邀請接受訪問但又要畀錢登廣告，於是報警求助。事件揭示原來呢啲呃錢橋段好舊，但仍然有人中招，聽聞有某慈善機構前主席就曾經上當，唔止做咗訪問，仲畀咗十幾、廿萬元添！
最近騙徒再出新花招，某善團嘅善心阿太早前收到一封以內地某機構名義寄出嘅信件，問佢想唔想攞美國學府嘅博士銜頭，仲講到明可以用十萬元幫佢搞掂喎！呢位阿太唔志在呢啲虛銜，冇理會佢，點知冇耐對方打電話來，好心急話可以即刻落嚟香港幫佢安排，嚇到阿太不知所措，好彩醒目避過一劫。
其實連博士頭銜都話賣得，真係難以置信。我哋問過好多慈善團體主席及總理，幾乎人人一係有親身經歷，一係就見證朋友差啲被騙徒呃咗。為咗趕絕呢啲類似祈福黨、寶藥黨嘅騙徒，善團不妨考慮喺新總理加入時，特別溫馨提示吓呢啲呃錢危機，避免再有人誤墮騙局喇。