政情：高永文落區勁尷尬
食物及衞生局局長高永文昨應立法會食物安全及環境衞生事務委員會要求，落區巡視旺角、九龍城及牛頭角三個食環署街市，了解街市檔位租戶困難。難得高局長唔怕熱巡街市，檔主們自然相當受落，當巡視牛頭角街市時，一名年逾八旬嘅補鞋匠李伯喺寒暄期間更祝佢官運步步高陞，而隨行嘅議員黃毓民加把口話：「裝冷氣，做特首！」搞到高永文非常尷尬，唔識應對。
民望高能力強 特首人選
李伯認為，高永文嘅民望高、待人謙虛有禮貌、工作能力強，係將來嘅特首好人選。亦有小販不忘佢十年前處理沙士問題嘅出色表現，相信佢一定能夠解決街市嘅問題。不過，喺牛頭角街市外就有逾百名上月發生三級火嘅黃大仙大成街街市販商，以及十多名全港公共街市大聯盟代表請願，要求政府盡快跟進火災善後賠償，並為無空調嘅街市安裝冷氣，改善營商環境；高永文逐一同請願人士握手慰問及接收請願信。
高永文巡視後承認，公共街市環境存在不少問題，包括加裝冷氣涉及電力負荷及裝修等技術性問題，當局稍後會全面檢討全港的公共街市，找出問題加以改善。據講高永文今次巡視完九龍區嘅三個街市後，下月會再巡視港島區三個街市，唔知到時又有咩趣事發生呢？