政情：十八銅人守護中環
港府未就二○一七年普選特首方案做諮詢，已有民間組織揚言要搞「佔領中環」（佔中），仲將平常嘅遊行預演佔中咁，無論商界以至政府都相當緊張，據聞有關方面近日作出相應行動大反擊。近日除咗有商會發表文章批評佔中損害本港營商環境外，有關方面仲向全港十八區區議會落「柯打」，要求建制派動議反對佔中，製造民意。如果各區議會都動議嘅話，就好似化身少林寺十八銅人咁守護中環。
忽然「齊心」討論全港性議題
其實早在上周四沙田區議會開會時，已有委任區議員趁警務處處長出席會議，動議譴責「佔中」，又呼籲警方維護社會秩序，結果喺泛民主派議員離席抗議下，獲得在座議員一致通過。正當大家以為沙田嘅建制派議員對反對佔中特別上心時，原來無獨有偶，元朗、離島、北區及深水埗等區議會都分別喺下月有議員提議討論呢個議題，有人仲相信其餘區議會會陸續將反對佔中列入議員動議事項添！
眾所周知，區議會向來甚少討論一啲全港性或同所屬地區無關嘅議題，加上依家個個區議會都重點討論緊政府撥款一億元嘅社區重點項目計劃，而且傾咗幾個月仍未能準時提交建議書，但反而各區竟然喺反對佔中問題上咁齊心？話冇約定都冇人信啦！我哋打聽之下發現，原來有關方面最近落咗柯打，話要十八個區議會都發聲反對佔中行動。至於由邊位或邊派議員去動議呢個議題，就由各區議會內嘅建制派自行決定。
不過，據聞有直選嘅建制派議員為免影響日後選情，拒絕提出動議，改由其他友好議員負責。據了解，依家大部分動議反對佔中嘅都係委任區議員，或是鄉事派嘅當然議員，只有小量來自民建聯或新界社團聯會嘅議員願意提出動議。
其實佔中行動明顯係違反法例，所以反對佔中亦未見得會失去市民支持，究竟唔敢提動議嘅建制派議員驚啲乜呢？莫非擔心成為當年支持《基本法》第二十三條立法後嘅翻版？