中環出更:曾裕孖老友組「善團聯合國」

由「美容天后」曾裕(Joyce)創辦並出任主席嘅身心美慈善基金,尋晚舉行第一屆董事局就職典禮,城中政商界名人齊去捧場。做博愛醫院總理多年嘅Joyce交遊廣闊,邀得眾多慈善界好友加入董事局拍住做善事,包括前保良局主席梁寶珠及前仁愛堂主席卓歐靜美出任基金副主席,仲有前博愛總理林辰峰、樂善堂總理楊小玲等人做基金總理,似足城中善團嘅「小聯合國」,場面好熱鬧。

Joyce話,身心美基金成立於六年前,當年天水圍、屯門等新界西接二連三發生社會及家庭問題,令人十分關注,所以佢創立基金以支援區內基層家庭及婦女,除咗設立社區服務中心、閱覽室之外,亦推出「一杯涼水」計劃及食物銀行,惠及嘅市民遍及港九新界。佢笑笑口話,依家做出一番成績,先至搵埋志同道合嘅好友一齊做大佢。至於正籌備中嘅社區廚房,預計六月中可正式啟用。

黃家和身體力行減廚餘

餐飲聯業協會會長黃家和(Simon)、婦女事務委員會主席劉靳麗娟及前仁愛堂主席黃達東等多名政商界人士都去捧場。Simon特別讚賞Joyce搞社區廚房嘅熱誠,佢話飲食業界面臨垃圾收費嘅巨大壓力,更加要支持減少廚餘,以便將來直接減輕支出。Simon都坐言起行,一於吃清光枱前嘅食物,不留一點廚餘,但代價係身體暴脹,今個月已肥咗八磅咁多。佢開玩笑話,呢個就係佢鼓吹筵席由八道菜減至六道菜嘅原因,未來仲想減至四道菜添!

黃達東由仁愛堂落莊之後專心做番金融老本行,講起香港賴以揚威國際嘅金融中心地位,可能因為佔領中環行動而受挫,佢直言要「反佔中」,不能任由有心人士玩搗亂喎!

卓妮

第一手消息請下載on.cc東方互動iPhone/iPad/Android/Windows Phone Apps