貪污腐敗就好比癌細胞，不但會蔓延，而且會致命，如果唔係國家領導人都唔會苦口婆心咁話，不反貪防腐，將亡黨亡國。內地官員曾經講過要借鏡香港嘅反貪經驗，以廉政專員公署為師，之但係非常之咁家門不幸，廉署出咗一個有辱門楣嘅前專員湯顯明，而貪湯當時嘅唯一上司又係貪腐醜聞纏身嘅前特首曾蔭權，內地官員唔知仲有乜嘢好借鏡。
導致湯顯明臭名遠播嘅係超出上限嘅酬酢開支，又請飲請食，又送禮收禮，無法唔令人懷疑佢居心叵測，假公濟私借機會親近京老爺拉關係。至於貪湯未卸任之前點解唔嚴肅處理貪曾，更加令人產生無限遐想。
好嘞，酬酢開支既然有可能係假公濟私嘅工具，若然五大紀律部隊酬酢開支勁增，應該點樣解讀呢？立法會議員提出質詢，政府交出一份相當令人驚奇嘅帳單，警務處、入境處、消防處、海關同懲教署過去五年嘅酬酢及外訪開支總數，不約而同大幅增加，入境處嘅本地酬酢開支竟然激增六成七，警務處、海關同懲教署嘅外訪開支亦增加超過六成。
相對而言，消防處叫做乖仔o架喇，過去五年酬酢開支「只係」上升百分之四十四。處長陳楚鑫解釋喎，開支上升係基於通脹及交流增加，交流對象包括內地同海外消防部門、緊急醫療部門、本地傳媒以及議員等等。陳楚鑫仲話，酬酢開支一直跟足指引辦事，如果開支超出上限，必須預早申請批核。據佢了解，消防處同事冇分單報銷嘅情況。
計功夫茶話齋，有冇跟足指引辦事好難講，事關政府披露五大紀律部隊過去五年嘅酬酢同外訪開支，只係提供一條總和嘅大數，冇分列出部門首長嘅個人開支細則，又冇按議員要求交代五大紀律部隊嘅送禮情況。喂，若然廉署當日只係提供一條總和嘅大數，鬼知湯顯明有冇超額應酬咩！
所以咯喎，陳楚鑫嘅解釋極其量係表面暫時冇破綻，並唔能夠徹底消除外界嘅疑惑。立法會保安事務委員會委員涂謹申就講得啱嘞，消防處酬酢開支按年有升有跌，相信處方按需要行事，但仍然會喺立法會提出跟進，要求交代部分開支嘅細節。冇辦法啦，既然香港官場已經出現癌細胞，貪曾同貪湯之外仲有一個前司長許仕仁被廉署落案起訴，好難避免民意代表驗屍咁驗，怕就係怕癌細胞蔓延至各大部門。
點都好啦，清者自清，濁者自濁，如果香港官場仍然有廉潔奉公嘅清官，麻煩各位繼續兩袖清風，千祈唔好學壞變成另一個貪曾！