政府審批免費電視牌照講足三年依然未有着落，正當全港市民以為法庭駁回無綫電視提出嘅司法覆核許可，政府好快就會扑錘發牌，誰知行政會議上星期突然以「冇議程」宣布休會，以為今日終於有得傾？睇怕大家都係太天真太傻，事關主理電視發牌嘅商務及經濟發展局局長蘇錦樑（Greg蘇），尋晚已經漏夜飛赴布魯塞爾同巴黎，展開為期六日嘅官式訪問，行程離唔開加強雙方經貿合作、探訪當地港商等，但最重要嘅係，行會討論免費電視牌照嘅議程一再落空。唔知究竟等緊啲乜呢？
