觀塘區議會坪石選區補選結果塵埃落定，社民連梁國雄（長毛）一如所料，輸畀被諷刺靠父蔭贏出嘅民建聯陳俊傑（橄欖仔）。但由長毛走激進路線兼「零落區」嘅劣勢下，依然從被視為建制派票倉嘅坪石選區搶攻三分之一選票，可見激進民主派喺傳統「老區」唔係冇市場。據聞過去多次喺該區同民建聯較勁嘅民主黨，睇見長毛今鋪高票落敗都大嚇一跳，亦為白鴿黨未來嘅選情響起警號。
坪石邨長年係民建聯地盤，白鴿黨今次一度考慮派出前黃大仙區議員徐百弟對撼橄欖仔，但因過去屢戰屢敗，加上早排沙田區議會兩次補選，都因泛民協調失敗而令民建聯漁人得利，最終決定放棄。反觀「空降」參選嘅長毛，過往喺該區冇任何地區工作之餘，參選期間全程「零落區」，加上當時正值立法會「拉布」爭議風頭火勢，長毛挑機冇慘敗仲贏得三分之一票數可謂異數。
白鴿黨近年出戰立法會選舉輸吓又一個、輸吓又多個，加上過去多次參選都畀人民力量狙擊，莫講話要搶灘區議會，就連力保議席不失都成問題，若果呢個老鴿黨再唔改革，睇怕好快陰乾似臘鴿。