政情：全程叉腰 極速閃人 CY早操硬晒軚
正所謂日日運動身體好，特首梁振英（CY）尋日晨早拉埋發展局局長陳茂波（Paul）去咗啟德，約同七百名地盤工友做早操並進行地盤零意外誓師，又安排咗全港八百多個工地全程直播，聲稱呢個安排係全港首創喎。但工業傷亡權益會就批評呢場係政治騷。
CY嘅頭號得力助手張震遠請辭唔做行會，傳媒當然想聽吓佢嘅睇法，但唔知係咪做運動做耐咗，CY喺活動後極速閃人，無按原定計劃同現場工友傾兩句，而唔答傳媒問題就更加唔在講啦。尋日活動主題係誓師儀式，不過最有睇頭嘅梗係台上官員拉筋壓腿顯功架。最近盛傳腰痛嘅CY，全程雙手叉腰，姿勢僵硬。
工會促關注工業意外
反而阿Paul可謂傾情演出，除咗落力拉筋外，仲同建造業議會主席李承仕唱雙簧呼籲工友注意地盤安全，講到興起時仲話，人類連天花病毒都控制得到，可見地盤零意外絕非無可能，誇張激昂到你唔信。工業傷亡權益會黃昏發聲明，話對呢場政治騷表示反感。該會批評最近幾日接連發生多宗嚴重工業意外，政府只做呢啲表面工夫，粉飾太平，而唔去改善問題。