政情:沈祖堯掘窿「辦公」 甘肅農村有網絡冇廁所

中文大學校長沈祖堯今個月月頭去咗甘肅,同班大學生一齊幫村民建橋。佢大呻無廁所好唔慣,搞到要飲少啲、食少啲,唔想去咁多次廁所。沈祖堯話佢咁大個人,頭一次去咁原始嘅農村,覺得無廁所好得人驚,「就咁掘個窿,大大小小都喺晒度,由於靠自然分解,所以隔幾日都仲見到。」「辦公」時仲要有一班雞鴨「觀眾」兼一齊排泄,陣味就更難頂,又惹埋好多烏蠅同蚊埋來,好唔衞生。

大鑊麵過垃圾河

農村無垃圾分類及收集,好多時村民都係將啲垃圾掉落河,再沖落下游分解。沈祖堯去起橋幾日,三餐都係由村民供應,一齊食大鑊飯。點知村民煮大鑊麵,會拎去條河度「過冷河」,「垃圾掉去下游,上游垃圾都會流落來,咁都係會中招。」好在食完又無咩事啫。佢話可能同佢原本係醫生嘅職業有關,唔係幾接受到,同行嘅環境局局長黃錦星就好似無咩嘢,所以都好佩服局長。

令沈祖堯好驚訝嘅係,嗰度有網絡、收到電郵,竟然無廁所,擔心只顧發展高科技,變相遺棄咗喺農村嘅婦孺同老人家,希望下次去起橋,要起埋個生化廁所,幫排泄物自然分解,去起橋都唔使咁辛苦呀嘛。

第一手消息請下載on.cc東方互動iPhone/iPad/Android/Windows Phone Apps