中環出更：麥瑞琼公幹年飛50次
有「零售一姐」之稱嘅香港零售管理協會主席麥瑞琼（Caroline），日前同丈夫楊蔚菁（Stephen）齊齊出席一個公開活動，佢大爆自己每個月都要坐四、五次飛機公幹，即係每年起碼飛五十次，仲飛得多過空姐，叫佢做「空中女飛人」真係當之無愧。不過佢冇因此而怕坐飛機，嚟緊仲會同老公周圍飛歎世界添。
唔怕市場掀零食減價戰
Caroline透露，六月底將與丈夫先飛越南峴港度假，七月就去冰島避暑，再直踩落倫敦兩周，叉足電先返港。佢話，通常都會揀喺暑假放大假，事關呢段期間冇咁忙，與身為中文大學商學院客座副教授嘅老公Stephen夾啱時間，可以去二人世界。
近日某連鎖零食店以廉價日本小食及用品為賣點，於本港零食市場迅速發展業務。問身為牛奶公司集團董事（健康及美容）嘅Caroline，擔唔擔心旗下零售公司嘅市場競爭力被削弱，從而掀起減價戰？佢就話唔多擔心，事關香港零售業市場頗大，就算有競爭都屬於良性，仲話有競爭先至有進步喎。