政情：委任議員變區會顧問？
立法會日前三讀通過區議會條例修訂草案，即二○一六年新一屆區議會將會全面取消所有委任議席，只繼續保留由鄉事委員會主席出任嘅廿七個當然議席。雖然當局因應全港各區人口數目而增加十九個直選議席，但將會被取消嘅六十八個委任區議員之中，都唔係個個願意放下身段轉戰直選，地區上於是傳出一種聲音，建議政府取消委任議席後，增設「區議會顧問」一職，讓有志服務地區嘅專業人士繼續發揮所長。
提供意見 冇投票權
究竟「區議會顧問」同委任區議員嘅身份同性質有乜唔同呢？最主要分別就係區議會顧問冇投票權，但如何發揮應有角色呢？有地區人士分析，獲委任加入區議會做顧問嘅人，雖然冇投票權，但可根據本身嘅專業知識提供意見。例如有議員建議地區工程計劃，有相關專業嘅顧問就可以查看計劃係咪可行，若計劃不可行，就算提出計劃嘅議員一意孤行，相信亦得不到議會一眾議員嘅投票支持，從而影響議會嘅決定。
該地區人士又分析，增設「區議會顧問」另一個主要作用，就係安撫部分委任區議員冇得撈嘅心情。其實取消委任制嘅聲音已經討論好多年，亦有委任區議員埋怨政府利用完佢哋後就「用完即棄」，漠視佢哋多年來做議員嘅功勞。事實上有好多聲音都話，委任區議員服務地區嘅勤力程度，絕不遜於直選區議員，只係礙於本身嘅專業背景，未有空間參與直選啫，所以增設「區議會顧問」一職，有安撫作用之餘，且百利而無一害。
泛民唔撐 當局未定
雖然「區議會顧問」冇投票權，但對於一直反對委任制嘅泛民主派，相信亦未必會支持。有官場中人透露，確實曾聽過有地區人士提出在區議會設立顧問角色，僅列席提供意見，而不設投票權，但目前只係初步討論階段，當局對此未有立場，又會在稍後舉行嘅地區高峰會，繼續聆聽地區人士嘅意見。唔知政制及內地事務局局長譚志源最後如何平衡各方意見呢？