功夫茶昨晚發咗一個噩夢，夢境好鬼死得人驚o架，如果拍成電影一定嚇到觀眾鬼殺咁嘈。
呢個噩夢嘅內容大概係咁嘅，十年後中國境內人煙稀少，滿目瘡痍，頹垣敗瓦，山窮水盡，絕大部分炎黃子孫死清光。中國人嘅死因主要係三種，一係集體毒死，二係集體餓死，三係集體自殺。集體毒死係因為黑心食品太多太氾濫，集體餓死係由於唔想被毒死而拒絕進食。至於集體自殺咯喎，無他嘅，眼見同胞一個二個魂歸天國，搞到中華盛世淪為折墮鬼域，做人已經冇意思嘞，所以嗰啲未毒死又未餓死嘅人都選擇走上一條自尋短見不歸路，用盡所有辦法了斷殘生。
嗱，呢個噩夢係咪好恐怖呢？雖然情節略為誇張咗少少，之不過如果中國製造嘅飲料同食品繼續以謀財害命嘅方向前進，噩夢未必唔會有朝一日成為鐵一般嘅殘酷現實。
喂喂喂，除咗五花八門嘅有害物質之外，令人聞風喪膽嘅孔雀石綠又重現江湖喇。珠海傳媒報道，當地有關部門抽驗水產品，四家淡水魚檔驗出水產品含有違禁藥物，包括三個鯿魚樣本以及一個鯽魚樣本。據了解，問題樣本來自中山市光明市場。市海洋與漁業局事後展開調查行動，前往相關市場抽驗兩個檔口嘅水產品。驗出乜嘢冇呢？結果顯示十二個樣本之中，四個存在孔雀石綠指標不合格情況。
唉，孔雀石綠，又係害人不淺嘅孔雀石綠。如果食肉等於服毒，功夫茶相信中國人遲早會患上「恐怕食肉症候群」，唔理係魚肉、豬肉定係牛肉，一見就作嘔反胃，唔知幾多人因此而營養不良甚至厭食致死。
黑心食品當然唔止咁少啦，內地傳媒最近揭發雲南昆明地下米線作坊加工廠嘅黑幕，無良商人利用污糟邋遢嘅坑渠水處理米線，將飯店餐廳回收而來嘅碎爛米線重新加工，工人着住水鞋喺泡米池作業，即將送去銷售嘅成品米線爬滿蒼蠅蟑螂。亦即係話，你喺內地食到嘅雲南特產過橋米線，隨時係一碗令你有必要走過陰曹地府奈何橋嘅米線。若然大家研究一下米線嘅湯底，相信絕對唔夠孟婆湯乾淨囉，問你怕未。
新一代中國人道德淪喪，確係唔講得笑o架，亡黨亡國嘅警告絕對唔係杞人憂天。你知啦，奸商嘅後台係貪官，貪官嘅後台係更大嘅貪官，官商勾結嘅情況之下，掛牛頭可以賣鼠肉，食白飯可以鎘中毒，有乜可能唔亡黨亡國呢？
功夫茶實在有必要向國家領導人懇切呼籲，係反貪防腐就唔好裝腔作勢，蒼蠅老虎一齊打必須坐言起行，否則國破家亡絕子絕孫，執政者全部係千古罪人。當然，功夫茶亦要提醒港產官僚，廣東重現孔雀石綠，香港隨時淪陷，千祈要把好關吖！