香港好多名人做咗政協後，最頭痛係北上開會時要講普通話，事關呢班政協嘅普通話水平真係非常普通。幸好大部分政協會議都係閉門進行，已經幫唔少政協遮醜，但醜事永遠遮不盡，而且會以光速傳播。好似年初無厘頭被委任做全國政協委員嘅前廉政專員「貪湯」湯顯明，最近被傳佢喺年初上京開兩會時，因為普通話水平極差而笑料百出，累到有人遲收工。
今年人大政協兩會期間，通常政協都會喺小組會議上輪流發言，如果普通話差嘅人都有自知之明，通常簡單講三至五分鐘就收口，點知貪湯諗住自己係新丁要搶鏡，一開口就講足十幾分鐘，在場政協聽唔明都無所謂，要忍住唔笑先至最辛苦。貪湯咁勇猛，唔通佢飲完茅台先至發言？
大家唔好以為貪湯噴完一輪口水就算數，事關政協小組會議會將每人嘅發言做紀錄，秘書即時寫低啲政協講過乜，但秘書聽唔明貪湯啲普通話，就算周圍問其他政協貪湯講咗啲乜，點知冇人聽得明，最後搞到秘書要攞貪湯份講稿照抄，無喇喇增加工作量。其實貪湯多年來同啲內地官員飲飲食食，點解連啲普通話都學唔好呢？莫非好嘢唔去學，衰嘢就學到盡？