每逢區議會選舉失利，泛民主派都歸咎於建制派嘅「蛇齋餅糉」，但其實泛民好多時候都係輸畀自己，唔夠建制派勤力。尋日有機構做咗個有關區議員「活躍度報告」，發現最勤力嘅二十大議員中，得三個係泛民議員。點知出席記者會嘅泛民議員同學者統統都唔認同調查結果，話呢個調查欠缺科學性同公正度，咁算唔算係輸打贏要呢？
有關調查由「社區發展動力培育」負責進行，主要由三方面評分十八區區議員嘅「活躍度」，包括會議出席率、發言次數及提交文件次數。出席記者會嘅幾位泛民議員，唔知係咪覺得調查結果唔啱心水，一致否定調查嘅公正性，白鴿黨劉慧卿話調查只知道區議員嘅工作量，根本反映唔到區議員嘅工作質素。連喺調查中最勤力提交文件嘅新民主同盟，其代表范國威都話細政團有利創造可觀數據，證明呢個調查有大把進步空間。
雖然個調查都發現有建制派嘅大懶蟲，包括北區區議員李國鳳，佢出席率只有五成七、提交文件同發言次數竟然係零；另外東區嘅蔡素玉喺過去一年從未提交文件，出席率都係高過一半多啲。不過，事實上泛民議員嘅出席率真係比建制派議員低，單係呢點都值得佢哋反思，唔知泛民幾時先識醒呢？