政情：盧偉國為「豆腐渣」解畫
政府早前要求立法會財委會撥款一億元，等四川雅安可以進行災後重建工作，但就引起外界猜測款項係咪真係可以全數落到災民手上。為咗澄清外界對內地救災工作嘅誤解，工程界立法會議員盧偉國（WK）同工程師學會會長蔡健權就喺剛過去嘅佛誕到訪雅安同蘆山，視察學校同醫院喺地震中受破壞嘅程度。
稱發泡膠係保溫層
WK話，本來工程師學會籌備緊一個汶川地震五周年視察活動，但當佢哋籌備得七七八八時，卻突然傳來蘆山地震嘅消息，於是佢哋兩人就改為去蘆山視察。喺兩日嘅參觀行程中，WK話睇過幾十幢建築物，雖然部分樓房批盪有脫落，間隔牆亦都有破損，但主體結構仍然完好無缺，證明建築物嘅強韌程度足以抵禦七級大地震。佢又話，當地政府興建咗唔少設施安置災民，學校亦都因為損毀程度不大而迅速復課，認為香港政府早前出資四億元援建係物有所值。
早前有傳媒揭發一所由本港援建嘅學校結構有偷工減料，WK就話學校磚牆嘅發泡膠係建築工人加上嘅保溫層，絕非「豆腐渣」工程。佢解釋，由於當地早晚溫差大，當地居民普遍會將發泡膠、面層膠網同英泥沙加入磚牆外圍，之後再喺上面塗上一層油漆，方便保暖同散熱。